సునీతా విలియమ్స్‌తో పాటు మరో వ్యోమగామి బుచ్‌ విల్‌మోర్‌ మే 6వ తేదీనే బోయింగ్‌ స్టార్‌లైనర్‌ వ్యోమనౌకలో అంతరిక్ష కేంద్రానికి బయల్దేరాల్సింది. చివరి క్షణాల్లో ఈ వ్యోమనౌకను మోసుకెళ్లే బోయింగ్‌కు చెందిన అట్లాస్‌ V రాకెట్‌లో సాంకేతికలోపం తలెత్తింది. రాకెట్‌లోని ఆక్సిజన్‌ రిలీఫ్‌ వాల్వ్‌ పనితీరు అసాధారణంగా ఉన్నట్లు గుర్తించడంతో ప్రయోగాన్ని నిలిపివేశారు.
ఆ తర్వాత పలుమార్లు ఈ రాకెట్‌ను ప్రయోగించేందుకు నాసా ప్రయత్నించినప్పటికీ సమస్య పరిష్కారం కాలేదు. మే 25న ప్రయోగం చేపట్టే అవకాశాలున్నట్లు చెప్పగా.. ఇప్పుడు మరోసారి దాన్ని వాయిదా వేశారు. వ్యోమనౌకలోని సర్వీస్‌ మాడ్యూల్‌లో చిన్నపాటి హీలియం లీకేజ్‌ ఉన్నట్లు గుర్తించామని, దాన్ని సరిచేసేందుకు ప్రయత్నాలు కొనసాగుతున్నాయని నాసా తాజా ప్రకటనలో వెల్లడించింది. జూన్‌ 1న మధ్యాహ్నం 12.25 గంటలకు ప్రయోగం చేపట్టే అవకాశాలున్నట్లు తెలిపింది. అదీ కుదరకపోతే జూన్‌ 2, 5, 6 తేదీల్లో లాంచింగ్‌కు అవకాశాలున్నట్లు పేర్కొంది.
స్టార్‌లైనర్‌ )తో మానవసహిత యాత్ర నిర్వహించడం ఇదే మొదటిసారి. తాజాది విజయవంతమైతే ఐఎస్‌ఎస్‌కు వ్యోమగాములను చేరవేసే రెండో వ్యోమనౌక అమెరికాకు అందుబాటులోకి వస్తుంది. ప్రస్తుతం స్పేస్‌ఎక్స్‌ వ్యోమనౌక ఈ సేవలు అందిస్తున్న విషయం తెలిసిందే.
ఇక, సునీతకు ఇది మూడో అంతరిక్ష యాత్ర. గతంలో ఆమె 2006, 2012లో రోదసిలోకి వెళ్లారు. మొత్తం 50 గంటల 40 నిమిషాల పాటు స్పేస్‌వాక్‌ నిర్వహించారు. 322 రోజలపాటు అంతరిక్షంలో గడిపారు. మునుపటి యాత్రలో భగవద్గీతను తీసుకెళ్లిన ఆమె ఈసారి తన ఆరాధ్య దైవం గణపతి విగ్రహాన్ని వెంట పట్టుకెళ్లనున్నట్లు వెల్లడించారు.
Comment List